مـنـتـديــات عبد المـنعـم الحمـــرى الـفـنـيــة ( السودانية)

مـنـتـديــات عبد المـنعـم الحمـــرى الـفـنـيــة ( السودانية)

منتـــدى عــام . ثقــافى . اجتمــاعى .رياضى .فنى


    أنا صوتى بحِّ ومُستجير !

    شاطر

    عبدالله عبدالرحمن

    عدد المساهمات : 9
    نقاط : 21
    السٌّمعَة : 0
    تاريخ التسجيل : 29/07/2011

    أنا صوتى بحِّ ومُستجير !

    مُساهمة من طرف عبدالله عبدالرحمن في الإثنين سبتمبر 26, 2011 4:36 am

    [SIZE="5"]
    بسم الله الرحمن الرحيم

    أنا بحَّ صوتى وبستجير !

    حازمانى بى توب اليقين
    ضهرك لحافى ومستكين
    حابقانى لى ما دُرتى شين
    لكنى بالاقدار رهين
    ما بنشرط توبك تخين
    زادك صبر وصبرك يقين

    وانا لسه يا دوبك سنة
    من عمرى ما مرت دحين
    ما شفت نُوار سوسنة
    لا سمعت صوت المندلين
    لا عرفت دنياى ألعنة
    لا ضُقت جُود المُحسنين
    لا قدرت دنياى أرسنة
    ولو طايعة جات امشيبا وين ؟!

    انا كنت بتساءل حزين
    ليه الظروف
    حارمانى من صدراً حنين؟
    هو أنا جيت متين ؟
    وبسأل دوام ليه قِسمتِِك
    منقوصة ما زى العوين ؟

    حسرات على زمناً قذر
    حرمنى من حضنك صغير
    وحسرات على زمناً كدِر
    ختانى فى ضهرك أمير! !
    وحسرات على زمناً عِكِرْ
    أبعدنى من جمبك سنين
    وحسرات على واقعا زِفِرْ
    خلانى فى وطنك سجين
    وسجانى مين ؟!
    يا ريتو ابليس اللعين !
    أنا كنت اتحصن وأبين !!!

    داخل على صيوان عزاك
    أسقينى كباية عجين
    أنا داير أقش دمعة شقاك
    وأفرش معاك بى كلمتين
    بى يات حروف انفذ اليك
    كِدا قولى لى ابداك بوين؟
    ولو الدموع رادت بُكاك !
    ابكيكى كيف بأى عين ؟

    ياريتنى زى أطفال كُتار
    ما عرفويوم درب الشقى
    وياريتنى فى حضنك نهار
    تدينى من شطرك سقا
    أنا كل كتاحة وغبار
    توبك رقيبتى بيخنقا
    يانعات فرادل العيش خضار
    والضحوة والدى مُلاحِقا
    من بدرى اتخذ القرار
    كم ضلعة لازم يشققا
    والوالدة باعجاب وانبهار
    ضِلعاتو تكتل تلحقا

    خُتينى فى الشجرة ام خَلال
    وسوى لى من توبك وِقا
    دِنْقير وصِقيع النهار
    دوَّخ رويحتى وحرقا
    طوطحينى زى باقى العيال
    الدنيا زول ما بلحقا
    زايد فى قومتو العيش جمال
    وكل حُفرة أمى تجرتقا


    يا أمى متحسر معاك
    وأنا ليك ببث حزنى الدفين
    وأنا جد حزين
    وبحزن كتير وكتين أشوف
    الراوية فى دونكى (التِمير )
    مليانة من حوض الحمير
    وبحزن كتير لامن أشوف
    كل والدة جاية مع العِصير
    وحزمة حطب فوق
    راسا بالحجم الكبير
    وشافع صغير محزوم
    معلق فى الضهير
    بحزن كتير كلما اشوف
    بِكرية باكية بتستجير
    مختونة والموقف خطير
    وادينا ماسكات فى حِبيل
    مجروحة تدعم من قِبيل
    يوم فات عليها نهار وليل
    نزافة جارى الدم غزير
    خارت خلاص وانهدَّ حيل
    أُماتا قطعن من عويل
    بِتوْلِد.. خلاص فضَّل قليل
    ولادة بالموس الكبير
    قطعت مشيمة كم صغير
    انا بحَّ صوتى وبستجير
    الداية يا ناس فيها خير
    الداية يا ناس فيها خير

    وبحزن كتير كلما أشوف
    درداقة فى يد أم ضمير
    جواها طوب او رملة قول
    يا ريتنى اتمكن وأقول !
    أكتب وأفضح كل زول
    يخذِلْ يعذِب أم ضمير !!


    يا ربى جيت انا فى الاخير
    ولو كنت ود بدرى وسمين!
    كان صوتى شاع صحى الضمير !
    وأنا هسى زاتى بصحى مين !!
    ناس نامو فى الفرش الوثير
    رافعين قزاز ومقفلين
    وناس واقفة فى عز الهجير
    تمشى وتقع متعثرين
    وناس الحليلات والبوادى مزارعين
    ما عرفويوم بنك المزارع دربو وين
    لا دقو باب ديوان زكاة ليحلو دين
    ولازول شرح ليهم شروط الغارمين
    وأنا هسى زاتى بصحى مين !!!!




    [/SIZE]

      الوقت/التاريخ الآن هو الخميس أكتوبر 19, 2017 2:17 am